fbpx
News

ನೀರು, ರಕ್ತ ಒಟ್ಟಿಗೆ ಹರಿಯುವುದಿಲ್ಲ: ಮೋದಿ

ಸಿಂಧೂ ಒಪ್ಪಂದದಲ್ಲಿ ಪಾಕ್ ಕತ್ತು ಹಿಸುಕಿದ ಭಾರತ

ಸಹನೆ, ಸಭ್ಯತೆ ಮತ್ತು ಉದಾರಗುಣವನ್ನು ದೌರ್ಬಲ್ಯವೆಂದು ಭಾವಿಸಿದರೆ ಎಂಥ ಪರಿಣಾಮ ಎದುರಿಸಬೇಕಾಗುತ್ತದೆ ಎಂಬುದು ಕುತಂತ್ರಿ ಪಾಕಿಸ್ತಾನಕ್ಕೆ ಮುಂದಿನ ದಿನಗಳಲ್ಲಿ ಅರಿವಿಗೆ ಬರಲಿದೆ.

”ನೀರು ಮತ್ತು ನೆತ್ತರು ಒಟ್ಟಿಗೆ ಹರಿಯಲಾರವು,” ಎಂದು ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ಹೇಳಿರುವುದು ಪಾಕಿಸ್ತಾನಕ್ಕೆ ಮುಂದೆ ಕಾದಿರುವ ಕೆಟ್ಟ ದಿನಗಳ ಸ್ಪಷ್ಟ ಸೂಚನೆಯಾಗಿದೆ.

ಕಾಶ್ಮೀರ ವಿಷಯದಲ್ಲಿ ಸದಾ ತಂಟೆ ತೆಗೆಯುತ್ತಾ ಭಯೋತ್ಪಾದಕರ ಮೂಲಕ ಭಾರತವನ್ನು ಇನ್ನಿಲ್ಲದಂತೆ ಕಾಡುತ್ತಿರುವ ಪಾಕಿಸ್ತಾನಕ್ಕೆ ಸರಿಯಾಗಿ ಬುದ್ದಿ ಕಲಿಸಲು ನಿರ್ಧರಿಸಿದ ಭಾರತ 59 ವರ್ಷಗಳ ಹಿಂದಿನ ಸಿಂಧೂ ನದಿ ನೀರು ಹಂಚಿಕೆ ಒಪ್ಪಂದದ ಮರುಪರಿಶೀಲನೆಗೆ ನಿರ್ಧರಿಸಿದೆ. ಒಪ್ಪಂದದ ಮೂಲ ಆಶಯಕ್ಕೆ ಧಕ್ಕೆ ಬಾರದಂತೆ ಇದುವರೆಗೂ ಪಾಕಿಸ್ತಾನಕ್ಕೆ ಉದಾರವಾಗಿ ಹರಿದು ಬಿಡುತ್ತಿದ್ದ ತನ್ನ ಪಾಲಿನ ಹಕ್ಕಿನ ನೀರನ್ನು ಸಂಪೂರ್ಣವಾಗಿ ಬಳಸಿಕೊಳ್ಳಲು ಆ ಮೂಲಕ ಪಾಕಿಸ್ತಾನದ ಗಂಟಲು ಒಣಗುವಂತೆ ಮಾಡಲು ನಿರ್ಧರಿದೆ.

ಇದರ ಅನ್ವಯ ಜಮ್ಮು ಕಾಶ್ಮೀರದಿಂದ ಪಾಕಿಸ್ತಾನಕ್ಕೆ ಹರಿದು ಹೋಗುತ್ತಿರುವ ಸಿಂಧೂ, ಚೆನಾಬ್‌ ಮತ್ತು ಝೇಲಂ ನದಿಗಳಿಗೆ ಮೂರು ಅಣೆಕಟ್ಟೆಗಳನ್ನು ನಿರ್ಮಿಸಿ, ಆ ನೀರನ್ನು ವಿದ್ಯುತ್‌ ಉತ್ಪಾದನೆ, ಕೃಷಿ ಚಟುವಟಿಕೆ ಮತ್ತಿತರ ಉದ್ದೇಶಗಳಿಗೆ ಬಳಸಿಕೊಳ್ಳಲು ನಿರ್ಧರಿಸಲಾಗಿದೆ.

ತಲ್‌ಬುಲ್‌ ಯೋಜನೆಗೂ ಮರುಚಾಲನೆ

1987ರಲ್ಲಿ ಕೈಗೊಂಡಿದ್ದ ತಲ್‌ಬುಲ್‌ ನಾವಿಗೇಷನ್‌ ಪ್ರಾಜೆಕ್ಟ್ ಅನ್ನು ಮರು ಆರಂಭಿಸಲು ನಿರ್ಧರಿಸಲಾಗಿದೆ. ಪಾಕ್‌ಗೆ ನೀರು ಹರಿವಿಗೆ ಅಡ್ಡಿಯಾಗಬಾರದು ಎಂಬ ಕಾರಣಕ್ಕಾಗಿ 2007ರಲ್ಲಿ ಈ ಯೋಜನೆಯನ್ನು ಏಕಪಕ್ಷೀಯವಾಗಿ ಕೈಬಿಡಲಾಗಿತ್ತು.

ಒಂದೇ ಕಲ್ಲಿನಲ್ಲಿ ಎರಡು ಹಕ್ಕಿ

ಸಿಂಧೂ ನದಿ ನೀರನ್ನು ಗರಿಷ್ಠ ಪ್ರಮಾಣದಲ್ಲಿ ಬಳಸಿಕೊಳ್ಳಲು ನಿರ್ಧರಿಸುವ ಮೂಲಕ ಕೇಂದ್ರ ಸರಕಾರ ಒಂದೇ ಕಲ್ಲಿನಲ್ಲಿ ಎರಡು ಹಕ್ಕಿಗಳನ್ನು ಹೊಡೆಯಲಿದೆ. ಪಾಕ್‌ ಜತೆಗಿನ ನದಿ ನೀರು ಹಂಚಿಕೆ ಒಪ್ಪಂದ ಏಕಪಕ್ಷೀಯವಾಗಿದೆ. ಇದರಿಂದ ಜಮ್ಮು ಕಾಶ್ಮೀರಕ್ಕೆ ದೊರೆಯಬೇಕಿದ್ದ ಹಕ್ಕಿನ ನೀರು ಕೂಡ ಪಾಕ್‌ ಪಾಲಾಗುತ್ತಿದೆ ಎಂಬುದು ಕಾಶ್ಮೀರಿಗಳ ಅಸಮಾಧಾನವಾಗಿತ್ತು. ರಾಜ್ಯದಿಂದ ಪಾಕ್‌ಗೆ ಹರಿಯುತ್ತಿರುವ ಮೂರು ನದಿಗಳ ನೀರನ್ನು ಗರಿಷ್ಠ ಪ್ರಮಾಣದಲ್ಲಿ ಬಳಸಿಕೊಳ್ಳುವ ನಿರ್ಧಾರದಿಂದ ರಾಜ್ಯದ ಜನರ ಬದುಕು ಹಸನಾಗುವುದರ ಜತೆಗೆ ಪಾಕಿಸ್ತಾನಕ್ಕೆ ನೀರಿನ ಕೊರತೆಯಾಗಿ ಉಸಿರುಕಟ್ಟಲಿದೆ. ಸಮೃದ್ಧ ನೀರು ಲಭಿಸುವುದರಿಂದ ನಿರುದ್ಯೋಗಿ ಕಾಶ್ಮೀರಿಗಳಿಗೆ ಕೈತುಂಬಾ ಉದ್ಯೋಗ ಸಿಗಲಿದೆ. ಆ ಮೂಲಕ ಉಗ್ರ ಚಟುವಟಿಕೆ ತಗ್ಗಲಿದೆ.

ಸಿಂಧು ನೀರಿನ ಒಪ್ಪಂದ ಏನು?

ಬಿಯಾಸ್‌, ರಾವಿ, ಸಟ್ಲೇಜ್‌, ಚೆನಾಬ್‌, ಝೇಲಮ್‌ ಮತ್ತು ಸಿಂಧೂ ನದಿ ಸೇರಿ ಒಟ್ಟು ಆರು ನದಿಗಳ ನೀರಿನ 80% ಪ್ರಮಾಣವನ್ನು ‘ಸಿಂಧೂ ನದಿ ನೀರು ಹಂಚಿಕೆ ವ್ಯವಸ್ಥೆ’ ಮೂಲಕ ಭಾರತದಿಂದ ಪಾಕಿಸ್ತಾನಕ್ಕೆ ಹರಿಸಲು 1960ರಲ್ಲಿ ಅಂದಿನ ಪ್ರಧಾನಿ ಪಂಡಿತ್‌ ಜವಾಹರ್‌ ಲಾಲ್‌ ನೆಹರು ಮತ್ತು ಪಾಕಿಸ್ತಾನ ಪ್ರಧಾನಿ ಅಯುಬ್‌ ಖಾನ್‌ ನಡುವೆ ಏರ್ಪಟ್ಟ ಒಪ್ಪಂದವೇ ಸಿಂಧೂ ನದಿ ನೀರು ಹಂಚಿಕೆ ಒಪ್ಪಂದ.

ಸಿಂಧು ಜಲಾನಯನ ಪ್ರದೇಶದ ನದಿ ಮೂಲಗಳು ಭಾರತದಲ್ಲೇ ಇರುವುದರಿಂದ ಯುದ್ಧ ಸಂದರ್ಭಗಳಲ್ಲಿ ಪಾಕಿಸ್ತಾನದಲ್ಲಿ ತೀವ್ರ ಜಲಕ್ಷಾಮ ಉಂಟಾಗಬಹುದು ಎಂಬ ಭೀತಿಯ ಹಿನ್ನೆಲೆಯಲ್ಲಿ ಅಂದಿನ ಪಾಕಿಸ್ತಾನ ಸರಕಾರ, ಭಾರತದ ಜತೆ ಒಪ್ಪಂದ ಮಾಡಿಕೊಂಡಿತ್ತು.

ಒಪ್ಪಂದದ ಪ್ರಕಾರ, ಪಂಜಾಬ್‌ನಿಂದ ಹರಿಯುವ ಬಿಯಾಸ್‌, ರಾವಿ ಮತ್ತು ಸಟ್ಲೇಜ್‌ ನದಿಗಳ ಮೇಲಿನ ಹಕ್ಕು ಭಾರತದ್ದಾದರೆ, ಜಮ್ಮು-ಕಾಶ್ಮೀರದಿಂದ ಹರಿಯುವ ಸಿಂಧೂ, ಚೆನಾಬ್‌ ಮತ್ತು ಝೇಲಂ ನದಿಗಳ ಹಕ್ಕು ಪಾಕ್‌ಗೆ ಸೇರುತ್ತದೆ. ಈ ಒಡಂಬಡಿಕೆ ಏರ್ಪಡಲು ವಿಶ್ವಬ್ಯಾಂಕ್‌ ಮಧ್ಯಸ್ಥಿಕೆ ವಹಿಸಿತ್ತು ಎಂಬುದು ಗಮನಾರ್ಹ. ಇಡೀ ವಿಶ್ವದಲ್ಲೇ ಇದೊಂದು ಉದಾರ ನೀರಿನ ಒಪ್ಪಂದ ಎಂದೇ ಬಣ್ಣಿಸಲಾಗಿತ್ತು.

copying or reproducing the above content in any format without approval is criminal offence and will be prosecuted in Bengaluru court © ಸುವರ್ಣಾನುಡಿ

Click to comment
To Top